Ons betaal vir kankerbehandeling uit jou beskikbare onkologievoordele

Dit is moeilik om te hoor dat jy of 'n geliefde kanker het. Om met kanker te leef noodsaak ondersteuning. Ons Onkologieprogram is maklik om te gebruik en dit gee jou en jou gesin gemoedsrus dat julle dekking vir kankerbehandeling het.

Hoe die Onkologievoordeel werk

Die Onkologievoordeel gee lede dekking vir goedgekeurde kankerbehandeling. Alle lede wat vir die Onkologieprogram geregistreer is, het toegang tot chemoterapie, medisyne en ander items asook bestralingsbehandeling en PET-skanderings - in die hospitaal en buite die hospitaal.

Dekking vir jou kankerbehandeling

Remedi bied drie voordeelopsies om uit te kies: Die Omvattende, Klasieke en Standaard-voordeelopsies.

Jou dekking hang af van die voordeelopsie waarop jy geregistreer is. Ons het op 1 Januarie 2025 die gesinslimiet op die Omvattende en Klassieke voordeelopsies verwyder en jou dekking is nou individueel vir elke gesinslid gestruktureer, beperk tot 'n algehele onkologievoordeellimiet. Dit beteken dat jou individuele kankerdekking nie meer tot 'n algehele gesinslimiet beperk is nie, wat jou gemoedsrus gee indien kanker by jou gediagnoseer word.

Jy sal bybetalings van tot 20% moet betaal as jy vir die Omvattende of Klassieke voordeelopsie geregistreer is en jy jou individuele algehele onkologielimiet (limiet per persoon) bereik het. Vir professionele gesondheidsorgverskaffers wat nie 'n betalingsooreenkoms met die Skema het nie, kan jou bybetaling meer as 20% wees as jou behandeling meer as Remedi se tarief kos. Ons sal professionele gesondheidsorgverskaffers wat 'n betalingsooreenkoms met die Skema het, teen 80% van die ooreengekome tarief vir alle verdere behandeling betaal. Jy sal die res uit jou eie sak moet betaal.

Jou individuele (per persoon) limiet is 'n deurlopende limiet wat vanaf die diagnosedatum tot die volgende jaar strek. Dit is nodig sodat elke gesinslid genoeg geld het om behandeling te kry gedurende hul jaarlikse behandelingstydperk vanaf hulle diagnosedatum.

Radiologie en patologie wat vir jou kankerbehandeling goedgekeur is, word ook uit die Onkologievoordeel gedek. Kankerbehandeling wat deel van die Voorgeskrewe Minimum Voordele is, word altyd ten volle gedek, sonder enige bybetaling. Dit is mits jy diensverskaffers gebruik met wie ons 'n betalingsooreenkoms het. Lede wat vir die Standaard-voordeelopsie geregistreer is, is dus verseker van voldoende dekking vir kankerbehandeling volgens die Voorgeskrewe Minimum Voordele.

Onkologie-innovasievoordeel

Remedi het vanaf 1 Januarie 2025 dekking ingestel vir lede wat op die Omvattende opsie geregistreer is vir 'n omskrewe lys innoverende kankermedisyne wat aan die Skema se kriteria voldoen. Hierdie medisyne is nie op die Klassieke of standaard-opsies beskikbaar nie. Jy sal met jou gesondheidsorgverskaffer moet konsulteer om te bepaal of jy dalk toegang tot hierdie duur, innoverende middels nodig het voordat jy toegang tot hierdie voordeel kan kry. Jy sal dalk 25% van die koste van hierdie behandelings moet betaal. Jou gesondheidsorgverskaffer kan jou deur jou persoonlike behandelingsprogram lei en die opsies bestuur wat jou behandelingsplan bied.

Onkologie verwysingsprys

Remedi Medical Aid Scheme sal vanaf 1 Julie 2025 'n onkologie-verwysingsprys instel. Dit is die hoogste bedrag wat ons vir 'n groep generiese of soortgelyke medisyne sal betaal.

Die verwysingsprys sal geld vir chemoterapie, hormonale terapie en ondersteunende onkologiese medisyne.
Medisyne wat op die ondersteunende medisynelys (formulier) of die voorkeurproduklys is, sal ons ten volle dek tot en met die ooreengekome tarief.
Medisyne wat nie op hierdie lyste is nie, sal ons tot en met die Skematarief of medisyneverwysingsprys betaal, wat ook al die laagste is.

Wat dit vir lede beteken

Indien die medisyne dieselfde of minder kos as wat die medisyneverwysingsprys is, het jy volle dekking en ons sal die medisyne ten volle betaal.
Indien die medisyne meer kos as wat die medisyneverwysingsprys is, moet jy die verskil tussen die medisyneverwysingsprys en die verskaffer se prys betaal.

Hoe om vir die Onkologieprogram te registreer

Kontak ons sorgspan deur 0860 116 116 te skakel om jouself of jou afhanklikes op die Onkologieprogram te registreer. Jy kan ook 'n e-pos na DCO_oncology@discovery.co.za stuur. Vir meer inligting oor die Onkologieprogram en die voordeellimiete wat jy op elk van die beskikbare Remedi-opsies het, kliek hier om ons onkologievoordeelgids te lees. Jy kan meer inligting oor die Onkologie-innovasievoordeel kry deur hier te klik om die gids op ons webwerf te lees.